ဂျာကင်အဟောင်းလေး မြန်မာရုပ်ရှင်ဇာတ်ကားဟာ Bo Bo Film Production မှ ထုတ်လုပ်ဖြန့်ချိထားတာဖြစ်ပြီး ဒါရိုက်တာ အောင်ဇော်လင်းရိုက်ကူးပုံဖော်ထားကာ ဇာတ်ညွှန်း မိုးနီလွင်က ရေးသားထားတာ ဖြစ်ပါတယ်။ ဒီဇာတ်ကားတွင် သရုပ်ဆောင်တွေအနေနဲ့ လွှမ်းပိုင်၊ သူရိယ၊ ခင်ဝင့်ဝါ၊ ဂျိုကာ၊ သိန်းလင်းစိုးနဲ့ တခြားသရုပ်ဆောင်များစွာက ပါဝင်သရုပ်ဆောင်ထားကြတာပဲ ဖြစ်ပါတယ်။
ဇာတ်လမ်းပုံစံက ရန်ကုန်မြို့ကို တက္ကသိုလ်တက်ဖို့ရောက်လာခဲ့တဲ့ လင်းညို့တစ်ယောက် ကျောင်းမှာကောင်မလေးတစ်ယောက်ကို မြင်မြင်ချင်း စိတ်ဝင်စားသွားခဲ့တာကြောင့် အဲဒီကောင်မလေးအကြောင်းကို သူ့ရဲ့ဒိုင်ယာရီစာအုပ်လေးထဲမှာ ရေးမိတဲ့အထိပါပဲ။ သူရေးထားခဲ့တဲ့ ဒီကောင်မလေးအကြောင်းကို သူ့ရဲ့သူငယ်ချင်းတွေက သိသွားခဲ့ပြီးနောက်မှာတော့ ဒီကောင်မလေးကိုရှာနိုင်ဖို့ ကြိုးစားကြပါတော့တယ်။
သူငယ်ချင်းအစ်ကိုဖြစ်သူရဲ့ အကူအညီဖြင့် လင်းညို့တွေ့ခဲ့တဲ့ ကောင်မလေးကို အတန်းတိုင်းမှာရှာကြည့်ခဲ့ပေမယ့် မတွေ့ခဲ့တာကြောင့် စိတ်ပျက်ခဲ့ရပါတယ်။ ဒါပေမယ့် လက်မလျှော့သေးဘဲ တက္ကသိုလ်ကျောင်းသား၊ ကျောင်းသူသစ် ကြိုဆိုပွဲနေ့တွင် ဒီကောင်မလေးကိုရှာဖို့ စီစဉ်ခဲ့ကြပြီး နောက်ဆုံးမှာတော့ လင်းညို့တစ်ယောက် သူသဘောကျတဲ့ကောင်မလေးကို တွေ့ခဲ့ရပါပြီ။
သူသဘောကျနေတဲ့ ကောင်မလေးက တစ်ကျောင်းလုံးရဲ့အလှဆုံးသူတစ်ယောက်ဖြစ်ပြီး သူမရဲ့နာမည်က ပိုးဥပါ။ သူရှာနေတဲ့ ကောင်မလေးကို တွေ့ခွင့်ရခဲ့ပေမယ့် အဆင့်ချင်းကွာနေသလို ခံစားခဲ့ရတဲ့ လင်းညို့ဟာ သူ့ရဲ့ခံစားချက်တွေကို မျိုသိပ်ဖို့ဆုံးဖြတ်ခဲ့ပေမယ့် ပိုးဥဒုက္ခရောက်နေချိန်မှာတော့ သူမျက်ကွယ်ပြုမနေနိုင်ခဲ့ပါဘူး။ တစ်ဖက်မှာလည်း ပိုးဥကိုအသည်းအသန်သဘောကျနေတဲ့ မင်းထင်သာကလည်း ပိုးဥအနားမှာ ရှိနေခဲ့တာပါ။
လင်းညို့တစ်ယောက် တကယ်ပဲပိုးဥအပေါ်ထားတဲ့ သူ့ရဲ့ခံစားချက်တွေကို ဒီလိုပဲအပြီးတိုင် ဖုံးကွယ်ထားလိုက်တော့မှာလား။ ပိုးဥနဲ့ လင်းညို့တို့ရဲ့ဆက်ဆံရေးက ဘယ်လိုမျိုးပြောင်းလဲလာမလဲဆိုတာကို ကြည့်ရှုရမယ့် လူငယ်အချစ်ဇာတ်ကားကောင်းလေးပဲ ဖြစ်ပါတယ်။ ဂျာကင်အဟောင်းလေး ဇာတ်ကားကို https://www.viu.com/ott/mm/mya/all/ တွင် ဝင်ရောက်ကြည့်ရှုနိုင်ပါတယ်။
